ފިރިހެނުން ޚިތާނު ކުރުމުގެ ޙުކުމް އަދި ޚިތާނު ކުރާ ސިފައަކީކޮބާތޯ؟

بسم الله الرحمن الرحيم ، الحمد لله رب العالمين، و الصلاة و السلام على رسول الله -صلوات الله وسلامه عليه- وعلى آله وصحبه أجمعين.
أما بعد:

ޚިތާނު ކުރުމަކީ އިސްލާމީ ޝަރީޢަތުގައި ކަނޑައެޅިފައިވާ ކަމެކެވެ. އަދި ޝަރުޢީ ދަލީލުތައް އެކަމަށް ވާރިދުވެގެންވާ ޢަމަލެކެވެ.

ދީނީ ގޮތުން އަދި ދުނިޔެވީ ޞިއްޙީ ގޮތުން ގިނަގުނަ ވެގެންވާ ފައިދާތަކެއް އެކުލެވިގެންވާ ރިވެތި ކަމެކެވެ.

އިމާމް البخاري 5891 އަދި مسلم 257 ރިވާކޮށްފައިވާ ހަދީޘްގައިވެ އެވެ. عن أبِي هريرة رضي الله عنه قال: سمعت رسول اللَّه ﷺ يقول: «الْفِطْرَةُ خَمْسٌ: الْخِتَانُ، وَالاسْتِحْدَادُ، وَقَصُّ الشَّارِبِ، وَتَقْلِيمُ الأَظْفَارِ، وَنَتْفُ الإِبِطِ» ނަބިއްޔާ ﷺ ހަދީޘް ފުޅު ކުރައްވަނިކޮށް އަޑު އެއްސެވިކަމަށް أبِي هريرة رضي الله عنه ގެ އަރިހުން ރިވާވެގެންވެއެވެ. ”ފިތުރަތުގެ ތެރެއިންވާ ފަސް ކަމެއް ވެއެވެ. ޚިތާނު ކުރުމާއި ކުރިމަތި ފަރާތުގެ (ވަށައިގެންވާ )އިސްތަށިތައް ބޭލުމާއި، މަތިމަސް ކޮށުމާއި، ނިޔަފަތި ކެނޑުމާއި، ކިހިލަފަތް ދަށުގެ އިސްތަށިތައް އުފުރުމެވެ.“

ބައެއް ޙަދީޘްތަކުގައި ޚިތާން ކުރުމަކީ އެންމެހައި ރަސޫލު ބޭކަލުންގެ ޢަމަލުފުޅު އަދި އެބޭކަލުން ޤާއިމްވަޑައިގެން ތިއްބެވި ޢަމަލެއް ކަމުގައި ބަޔާންވެގެންވެ އެވެ.

ނަބިއްޔާ ﷺ ޙަދީޘް ކުރެއްވި އެވެ. (…أربع من سننِ المرسلين : الختانُ – ، والتعطرُ ، والسواكُ ، والنكاحُ) ”އެންމެހައި ރަސޫލު ބޭކަލުންގެ ޢަމަލުފުޅު (ސުންނަތް) ތަކުގެ ތެރެއިން ހިމެނިގެންވާ 4 ކަމެއްވެ އެވެ. … (އޭގެ ތެރޭގައި ޛިކުރު ކުރެއްވި އެވެ.) ޚިތާނު ކުރެއްވުމެވެ.“

ޙަދީޘްގައި ބަޔާންވެގެންވާ ފަދައިން ޚިތާނު ކުރުމަކީ ފިޠުރަތުގެ ތެރެއިން ކަނޑައަޅުއްވާ ކަންތައްތަކުގެ ތެރެއިން ކަމެކެވެ.

ޝަރީޢަތުގައި އެފަދައިން ކަނޑައެޅިފައި ވުމުން އެކަން ކުރުމަށް އަދި އެކަމުގެ މަޤްޞަދާއި އޭގެ ޙައްދަކީ ކޮބައިކަންވެސް ދީނުގައި ޝަރީޢަތުގައި ޛިކުރުވެގެންވާނެ އެވެ.

ފިރިހެނުންނަށް ޚިތާނު ކުރުމަކީ ވާޖިބެއް ކަމުގައި ވަރަށް ގިނަ ޢިލްމުވެރިން ދެކެވަޑައިގަންނަވަ އެވެ. މި ބަސްފުޅަކީ الشَّافعيَّ މަޛްހަބާއި الحنابلة އިންގެ މަޛްބަހުގެ ޤައުލެވެ. މި ޤައުލަކީ ގިނަ ޞަޙާބީ ބޭކަލުންގެ ޤައުލުވެސްމެ އެވެ. އަދި އުއްމަތުގެ ބޮޑެތި މުޙައްޤިނުންނާއި އިމާމުންގެ ތެރެއިން ابنُ تيميَّة މި ޤައުލު އިޚްތިޔާރު ކުރެއްވި އެވެ. ފަހުގެ ދުވަސްތަކުގައި އުއްމަތަށް ދުށް ޢިލްމުވެރިންގެ ތެރެއިން ابنُ عُثيمين، މިފަދައިން ދެކެވަޑައިގަންނަވަ އެވެ. އަދި މިފަދައިން ސަޢުދީ ޢަރަބިއްޔާގެ ފަތުވާ ކޮމެޓީން ފަތުވާ ނެރުއްވާފައިވެ އެވެ.

ސަޢުދީ ޢަރަބިއްޔާގެ ކުރީގެ މުފްތީ الإمام عبد العَزِيز بن باز -رحمه الله- ރިޔާސަތުގައި، ސަޢުދީ ޢަރަބިއްޔާގެ ފަތުވާ ކޮމެޓީން ނެރުއްވާފައިވާ ފަތުވާގައިވެ އެވެ. ”ފިރިހެނުންގެ ޙައްޤުގައި އެއީ ވާޖިބުވެގެންވާ ޢަމަލެކެވެ. ސަބަބަކީ، އެކަމަށް (ޚިތާނު ކުރުމަށް) ނަބިއްޔާ ﷺ ވަނީ އަމުރުފުޅު ކުރައްވާފަ އެވެ. އަދި ނަބިއްޔާ ﷺ ގެ އަރިހުން އިސްލާމްވި މީހަކަށް ހަދީޘް ކުރައްވާ ވިދާޅުވިކަމަށް ޞައްޙަވެގެންވެ އެވެ. (ألْقِ عنك شَعْرَ الكُفرِ، ثم اختَتِن) ”ކުފުރުގެ އިސްތަށިތައް ތިބާގެ ހަށިގަނޑާ ވަކިކޮށް އެއަށްފަހު ޚިތާނު ކުރާށެވެ.“ فتاوى اللَّجنة الدَّائمة – المجموعة الثانية 4/42

ދަންނައެވެ. ޚިތާނު ކުރުމުގެ މުހިންމުކަން ބަޔާންވެ އެނގިގެންދަނީ، ބައެއް ޞަޙާބީ ބޭކަލުން ޚިތާނު ނުކުރާ މީހާގެ ހެކިބަސް ޤަބޫލު ނުކުރެވޭނެ ކަމާއި އޭނާގެ ނަމާދު ޤަބޫލުވޮޑި ނުގެންނެވޭނެ ކަމާއި އަދި އޭނާ ކަތިލާ އެތީގެ މަސް ކެއުން ހުއްދައެއް ނުވާނެ ކަމުގައި ވިދާޅުވެފައިވެ އެވެ. މިފަދައިން ޞަޙާބީ ابنِ عبَّاسٍ ވިދާޅުވެފައިވެ އެވެ.

ފިރިހެނާ ޚިތާނު ނުކޮށް ހުރުމުން އޭނާގެ ޒަކަރު އެ ހަންކޮޅުން ނިވާވެފައިވެ އެވެ. މިއީ އޭގެ ސަބަބުން އެތަނުގައި ނަޖިސް ހަރުލައި ސާފު ނުވާނެ ސަބަބެކެވެ. އެއީ، އެ ހަންގަނޑު ކުޑަކަމުދާ ގުނަވަން ފޮރުވައި ނިވާކޮށް ނުކުންނަ ނަޖިސް އެތަނުގައި ހަރުލަ އެވެ. އަދި އެ ހަންކޮޅު ވަކި ނުކުރާހާ ހިނދެއްގައި އެމީހަކަށް އިސްތިޖްމާރު (ހިލަ ބޭނުންކޮށް ތާހިރުވުން) ނުކުރެވޭނެ އެވެ. ވުމުން، އެއީ ހަށިގަނޑާ ވަކިކޮށް ނައްތާލަންޖެހޭ ހަނކޮލެއްގެ ގޮތުގައިވެ އެވެ.

އެމީހާގެ ނަމާދު ޞައްހަ ނުވާނެ ކަމުގައި ބުނެފައިވާ ބަސްފުޅު ބިނާވެގެންވަނީ މި ސަބަބަށްޓަކަ އެވެ.

އެއަށްފަހު ބުނަމެވެ. ޚިތާނު ކުރުމުގެ ސިފައަކީ، އެއީ ޒަކަރުގެ ކޮޅު ނިވާ ކުރާ ހަންގަނޑު ވަކިކޮށް ބުރިކޮށްލުމެވެ. އަދި ޒަކަރުގެ ކޮޅު ފެންނާން ހުންނަ ގޮތަށް ހާމަކޮށް ފާޅުވާނެ ގޮތުގައި ހެދުމެވެ.

ޒަކަރުގެ ކޮޅު ނިވާ ކުރާ ހަންހޮޅު ބުރިކުރުމުން އެ މަޤްޞަދު ޙާޞިލްވީ އެވެ. މިއީ ޚިތާނު ކުރުމުގެ ތަޖުރިބާލިބިފައިވާ ފަރާތްތަކަށް އެނގި ބަޔާންވެގެންވާ ކަމެކެވެ.

އަދި މި ޢަމަލު އުމުރުން ޅައިރުގައި ކުރުން ހެޔޮކަން ބޮޑުވެގެންވެ އެވެ. ސަބަބަކީ، ޅައިރު މިފަދައިން ހަންކޮޅު ބުރިކުރުން އެއީ ފަސޭހަ ކަމެއްގެ ގޮތުގައި ވުމެވެ.

ވުމުން، މި މަޤްޞަދު ޙާޞިލްވެއްޖެހިނދު އެއީ ޚިތާނު ކުރެވުމެވެ.

ކުރީ ޒަމާނުގައި ކުރަފަތިން އެ ހަންކޮޅު ބުރިކޮށް އެތަނުގެ ފާރު ފަސޭހަވަންދެން ޙަރަކާތް ނުކޮށް އެ ކުއްޖާ ބާއްވަ އެވެ.

މި ޒަމާނުގައި ހޮސްޕިޓަލް ތަކުގައި އޮޕަރޭޝަނެއްގެ ސިފައިގައި މިކަން ކޮށް މަދު ގަޑި ތަކެއްގެ ތެރޭގައި ހެލިފެލި އުޅެވޭ ގޮތުގައި ވެ އެވެ.

އަދި ބޭސްފަރުވާ އާއި ތަމައްދުނާއި ތަރައްޤީޤެ ދާއިރާގެ ކުރިއަރައި ގޮސް، ހަންގަޑު ބުރިކޮށްލުމުގެ ބަދަލުގައި، އެތަނަށް އެކަމަށް ޚާއްޞަކޮށްފައިވާ ދަގަނޑު ބޮޅެއް ލައްވައި، ދެތިން ދުވަސްތެރޭގައި އެ ބުރިކުރަން ޖެހޭ ހަންކޮޅު ބުރުކޮށްލުމެއް ނެތި އެ މަޤްބަދު ޙާޞިލްވެ، އެ ހަންކޮޅު ފައިބައިގެން ދެ އެވެ.

ލޭ ފޭބިކަމުގައި ވީނަމަވެސް އަދި ލޭ ނުފޭބި ކަމުގައިވީނަމަވެސް އެކަމުގައި މައްސަލައެއް ނެތެވެ.

ޝައްކެތްވެސްނެތެވެ. އިސްވެ ބަޔާންކުރެވުނު ސިފައިގައި، ޒަކަރުގެ ކޮޅު ނިވާކުރާ އެ ހަނކޮޅު ވަކިކޮށް، ޒަކަރުގެ ކޮޅު ހާމަވެ ފެންނަން އޮންނަ ގޮތުގައި އެކަން ކުރެވިއްޖެހިނދު، އެއީ ޚިތާނު ކުރެވުނީ އެވެ.

އެކި ޒަމާންތަކުގައި އެކަން އެކިއެކި ސިފައިގައި ކުރުމަކީ މައްސަލައެއް އޮތް ކަމެއް ނޫނެވެ.

والله تعالى أعلم. وصلى الله على نبينا محمد وآله وصحبه وسلم.